Holy Shit
Dr Totalitarismus vo de Religione
Wo yber allne Gsellschafte will throne
Sehsch in allne Egge vo dr Ärde chas denn yberhaupt no schlimmer wärde
D’Diktatore findes dr Hit Mr sage numme Holy Shit
Schlimmer isch nid, sälle oder jene
Doch ab dr Gsamthait bliibt dr numme s’gleene
Zum Illustriere e bitzeli neutraler wird unser Bliggfäld als wie schmaler
Mr Erhebe d’Fasnacht zur Religion Do wird eim bewusst: Was fiir e Hohn
Au mir wänn Regle ha Und wehe me haltet sich nid dra
1. Du sollsch kai anderi Fasnacht fyyre
Kafir, Gojim, Mleccha, Mamukh oder schlicht e Heid
Wär nit bi uns drbii isch duet mr schampaar leid
sälbst die Bestrofig goht mr z’wenig wit und Handle mit dir will ich nit
Oft do läbsch gar richtig gfährlig, mit Mässer Bombe oder sunstigem shit
2. Du sollsch dir am Morgestraich nit mit Blitz e Bildniss mache
Dr Fokus ligt uffem Momänt, e abbild dervo ligt nit in dine Händ
Gniess es und verzicht uff’s Götzebild, an Diine Wänd
Dr Charly hebdo cha dr gärn bewiese so ebbis bringt e yyserni briise
3. Du sollsch d’Ladärne nit Plotte
Heilig isch uff dääre Wält , Vielne lyt nur s’liebe Gäld
Immerhin chasch die no verstoh.
Well dert Logik z’vorderst duet stoh
Im Gegesatz findet sich e mänge,
Wo e Ideologie verfolgt und maint das däti länge
Statt selber dängge git me das lieber ab,
Voltaire Atatürk und Combes die drülle duure im Grab
5. Respegtier dr Ändstraich und halt en heilig
Ebb Ramadan Shabat oder hailige Sunntig
Egal ebb är schwarz oder eher bunt sig
Radikaler wirds laider als wie schnäller
Numme wärde die Gläubige derbyy nid häller
7. Du sollsch nit ohni Larve musiziere
Mänge Pauker oder au Bleeser
Luegt immer wieder z tief in d’Gleeser
Nochhär het är e grosse, rote Zingge
Wo ohni d Larve bim spiile duet blingge
Mir wänn und kenne das nid begriesse
Und Güügeler nur mit Larve gniesse
Denn selbst e soone lärmig Platzkonzärt
Gwinnt mit scheene Larve enorm an Wärt
10. Du sollsch nit vo andere Clique d’Fasnächtler begehre
Sott Dir bin ere andere Glygge e flotti Schnalle
So halt rein pfyfferisch hailloos gfalle
Und sott si sich gääge Di Begehre mit Händ und luutem Piff sogar wehre
Denn loss du sie gschiider in rueh Sunst göhn am schluss no d’Gränze zue
Aber woo Dogmatige trenne und sich dr Zorn entfacht
Do gsehsch z’Basel e Narr wo härzlig lacht
Kei Heilige Krieg, scheiss oder emänd striit
Nai Numme die wunderbar heerligi Fasnachtszyt
Falls de merggsch es fählt ab und a e nummere do
Das isch well’s in dr Schuel z’oft um d’Religione duet go
Uff dr Lampe stoht was fählt well dr Platz dr Dichter quält