Phenix Basel

Fiir was (ver)brennsch du?

Es lauft so einiges schief und duet uns nit basse

was mer aber nit wänn isch irgend ebbis hasse

Lieber dien mr s’Schlächte verbrenne

und in däm wo neu entstoot e Phenix erkenne

Bim Baanhof gseet me s’Eländ offesichtlig

ass me s ändlig mol merggt isch trotzäm richtig,

D‘Ignoranz und s’Eländ nit welle erkenne

isch ebbis vom Erschte wo mr wänn verbrenne

D’Schlange bi dr Gassekuchi waggst vo Daag zu Daag
Nit nur Fremdi au mir Basler sin in däre Laag

D‘Auge verschliesse und d Broblem verkenne

au das isch ebbis wo mr wänn verbrenne

S‘goot Stammdisch no Stammdisch laider zue
drfiir dien mr uns Psychologe zue
Einsamkeit gits z’Basel ganz e Huffe
die gheie mr uff dr Schitterhuffe

Jede in sinere eigene Wält – me mues nitmol  überdryybe
duet em andere sini Yberlägehait under d Nase ryybe
Dr eige Wichtigkeit go nooche renne

e Eigeschaft, die sottsch scho lang verbrenne

Woone isch wichtig, e Bedürfniss, das brucht jetzt wirgligg e jede     
Bevor in d’Woonig chasch mueschs z’erst mit em Mieterverband go reede
Eigene Inträsse statt em Guete nocherenne
Dir aanets mir maine au das sottsch ändlig verbrenne

E mänge maint är haig ebbis uf em Kaschte

drby duet är numme anderi belaschte,

wenn me denn aafoot sich scho mit wenig z’ begniege

duet unsere Phenix sogar vo sälber fliege

Wenn mi Social Media begleitet
und doo dermit my ganz Lääbe leitet,

wenn ich mi dr Meerhait fieg

flieg mi liebe Phenix flieg

Jede kauft und produziert -zig Waffe
dr näggst Krieg uff dr Wält fiere d’Affe
Wenn sich alli Dottle bekriege
isch es wiedermol Zyt zum Fliege

Panzergranate wo dien knalle
Bombe, wo  Mensche falle
Wenn ich zum Krieg afoo d’Wält belieg
Flieg mi liebe Phenix flieg

Liste sinn spanned die vom Eppstein fäält
Schiinbar isch’s schützenwärt wär Kinder quält
Wenn me sich mit Ussitze duet begniege

au denn muesch du mi, liebe Phenix fliege

 Sii, du, äs, oder *, egal es isch nit rächt

es git efang so an die hundertdausig Gschlächt
Wenn ich d’Sproch verbieg
flieg neue Phenix flieg

Uff das dr Phenix die Wält erleesi
Nur hätt das Fyyr denn e gwissi Greessi

Mir sinn ganz neu und no am Uffbaue, aber scho voll drbii!
Wenn dir nimme wohl isch, musikalisch wyterkoo sottsch.

Wenn de Mammi oder Babbi bisch und di Nochwuggs in d’Fasnachtswält schigge wottsch.

Mäld di unter info@phenix-basel.ch  Mir dräffe uns jewyyls am Zyschdig Oobe.